Республиканың улусчу чогаадылга төвү Тываның бүгү-ле өг-бүлелеринге, чаа өгленген аныяктарынга, хөй чылдарда эгин кожа чурттап чоруурларга өг-бүлениң өмээржикчилериниң хүнү - Бүгү Россияның өг-бүле аас-кежииниң болгаш ынакшылдың байырлалы-биле байыр чедирип тур.
Тываның янзы-бүрү кожууннарында культура адырында ажылдап чоруур, уран чүүлге бердинген өг-бүлелер хөй. Оларның аразында аныяк өг-бүлелер база чылдан чылче немежип турары өөрүнчүг. Улусчу чогаадылга төвүнүң эртирип турар хемчеглеринге, ылаңгыя, "Тыва - бистиң өргээвис" фестивальга, "Уран чүүлдүң күзүнгүзү" мөөрейге, ыры-хөгжүм ансамбильдерниң аразынга "Үш аккорд" мөөрейге, чогаадыкчы коллективтер аразынга көрулделерге удаа-дараа киржип кээп турар өг-бүлелер кайы көвей.
Уран чүүлге бердинген өг-бүлелер боттарының талантызын чонга бараалгатпышаан, оларның хей-аъдын бедидип, улуг-биче чаңгыс чер-чурттугларын уран үүлге сундуктуруп, хаара тудуп, үнелеп четпес чуртталганың каастакчылары болуп чоруурлар. Сагыш-сеткилин ыры-шоор, аялга, сам-биле доңнап алгаш, холдарын быжыг туттунчуп, Сибирьниң болгаш Россияның сценаларынга тыва чоннуң онзагай культуразын бараалгадып, шаңнал-макталдыг черлерни чаалап ап чоруурлар.
Республиканың улусчу чогаадылга төвүнүң удуртулгазы болгаш коллективи ук байырлал таварыштыр Тываның шупту культура одагларында ажылдап чоруур өг-бүлелерге уран чүүлге бердингени дээш четтиргенин илередип, ажыл-ижинге чедиишкиннерни, өг-бүлелеринге аас-кежикти күзеп турлар. Тыва Республиканың өг-бүлелеринге чараш байырлалда аас-кежии быжыксын, кадык, чаагай чуртталга мөңгеде турзун, чедиишкин болгаш чедимче кезээде кады чорзун деп йөрээдивис.
Өг-бүлениң, ынакшылдың, шынчы чоруктуң хүнү-биле!
08 Июл.
