Январь 24‑те Чөөн-Хемчик кожуунга алдарлыг драматург, чогаалчы болгаш хөй‑ниити ажылдакчызы Чылгычы Чимит-Доржуевич Ондарның чырык адынга тураскааткан байырлыг хемчеглер диңмиреп эрткен.
Байырлалдың дээжи кезээ — Чадаананың шии театрынга Чылгычы Ондарның чырык адын албан езузу-биле мөңгежидип тывысканы болур.
Хүндүлүг аалчылар — Тыва Республиканың культура сайыды Виктор Чигжит, драматургтуң өөнүң ишти Саяна Ондар, ТР-ниң культура Профэвилелиниң даргазы Галина Сүрүң, Республиканың улусчу чогаадылга төвүнүң удуртукчузу Уран Тулуш, Тываның Виктор Көк-оол аттыг хөгжүм-шии, Кызылдың ойнаарактар театрларының артистери база өске-даа хөй-ниити, культура болгаш уран чүүлдүң төлээлери тураскаалдыг езулалга улуг үлүүн киириштирип, чогаалчының намдарының болгаш чогаадыкчы ажыл-чорудулгазының дугайында чылыг сактыышкыннарны кылганнар.
Кожууннуң Мерген-Херел Монгуш аттыг культура бажыңынга ТР-ниң Алдан-Маадыр музейи бодунуң шыгжамырындан Чылгычы Ондарның литературлуг өнчүзүнге болгаш тыва шиини сайзырадырынга тураскааткан «Хүннээректиг Тыва черге ээп кээр мен» деп экспозицияны делгеп бараалгаткан.
Аныяк болгаш ат-сураглыг артистерниң күүселдези-биле Ч.Ч. Ондарның бижээни «Чарба, бөрт болгаш ынакшыл», «Соңгулда» база «Чаңгыс хадың» деп ханы ужур-уткалыг шиилерни келген чон улуг сонуургал болгаш сеткил ханыышкын-биле көрген.
Республика иштинде «Тергиин улусчу театр» деп атка төлептиин бадыткап чоруур Чадаананың шии өргээзинге чер-чуртунуң ховар салым-чаяанныг оглу Чылгычы Ондарның адын тывысканы Тываның уран чүүлүнүң сайзыралынга алдарлыг драматургтуң кииргени үнелеп четпес үлүг-хуузун онзалап, хүндүлеп көргениниң көскү херечизи болур.
Тываның улусчу чогаадылга болгаш дыштанылга төвүнүң тырттырган чуруктары.
Чадаананың шии театрынга шылгараңгай тыва драматург Чылгычы Чимит-Доржуевич Ондарның чырык адын мөңгежиткен
25 Янв.
