Тывада халдавырлыг аарыгга удур профилактиктиг хемчеглерниң бирээзи камгалал маскаларны үргүлчү кедери. Республиканың культура одагларының коллективтери боттарының ажылындан аңгыда ниитилелге дуза кадып, четтигип турарын @tmgnews17 дыңнадып тур.
Улуг-Хем кожууннуң Шагаан-Арыг хоорайда культура төвүнүң ажылдакчылары бир дем-биле кожуунда эмчи төвүнге дуза кылдыр 34 камгалал хептерин даарааннар. Бии-Хем, Чөөн-Хемчик, Улуг-Хем кожууннарда культура ажылдакчылары камгалал маскаларны база даарап, чонга болгаш эмчилерге, доскуул черлеринде дежурныйлаашкын эрттирип турар чаңгыс чер-чурттугларынга үлээн. Оон ангыда культура ажылдакчыларының аразында волонтерлар база бар. Олар аъш-чем болгаш хереглел барааннарлыг барбаларны хоочуннарга, хөй ажы-толдуг ог-бүлелерге үлеп, дузаны кадып турар.
Культура одаглары бүдүн Россияда чоруп турар «Эмчилерге четтиргенивис илереттивис» деп акцияга киржири-биле чонун кыйгырып, онлайн-хемчеглерни база эрттирип турар. Ынчалдыр Чөөн-Хемчик кожууннуң Чыраа-Бажы суурнуң бичии чурттакчылары эмчилерниң хей-аъдын бедидер бижиктер туткан чуруктарын культура бажыңының социал четкилерде арыннарынга салган. Бо хунде хамчыктыг аарыг-биле демисежип турар эмчилерге шүлүктээн одуругларны Тес-Хем кожууннуң Ак-Эрик суурунуң культура бажыңының ажылдакчылары база социал четкилерже үндүрген.
Республиканың улусчу чогаадылга төвүнүң удуртулгазы эрткен дыштаныр хүннерде Тывада бот-хоргадал чурумун май 31-ге чедир узатканын барымдаалап, төптүң хоочуннарынга аъш-чем, камгалал маскалырын, антисептиктерни бажыңнарынга чедирген. Төптүң директору Елена Ондар хоочуннарның кадыын айтырып, камнанырын дилеп, чагыглар болгаш өске-даа айтырыглар тыптып келзе, дарый телефоннап дамчыдарын дилээн.
СМИ о нас: Культура ажылдакчыларың ачы-дузазы
18 Май.
