Үе канчалдыр-даа өскерлип, амыдыралга кызыгаарлар-даа тургустунуп келирге, уран чүүл кажан-даа бодунуң күжүн чидирбес. Ону чыл санында эрттип турар республика чергелиг “Тиилелгениң салюду” фестиваль бадыткаан. Фестиваль бо чылын онлай-хемчээлге эртсе-даа, киржикчилер саны кажангызындан-даа хөй болганын @tmgnews17 дыңнадып тур.
Улуг Тиилелгениң 75 чылдаан оюнга тураскааткан фестиваль май 8-тен 18-ке чедир үргүлчүлээн. Ону Республиканың улусчу чогаадылга болгаш дыштанылга төвү ТР-ниң Культура яамызының удуртулгазы-биле организастап эрттирген.
Фестивальдың бирги чадазынга 17 кожуун киришкен, аңаа 50 хире киржикчи шилиттинген. Киржикчилер негелде езугаар номинация аайы-биле ажылдарын таныштырган. “Тиилекчиге чагаа” деп номинацияга Тиилелгени чоокшулаткан дайын хоочуннарынга салгалдарның байыр чедириишкинин азы мөгейигни видео-чагаа кылдыр таныштырган. “Сактыр бис. Чоргаарланыр бис” – литературлуг, уран күүселде, дайын темазынга өг-бүлениң кежигүннери шүлүк номчаан. “Тиилелгениң ырылары” номинацияга ыры-хөгжүм ансамбльдери дайын азы тиилелге темазынга ыры күүсеткеннер.
Ниитизи-биле онлайн-фестивальга 230 ажыг кижи киришкен, оларның 46-зы хоочуннар. Киржикчилер аразында чогаадыкчы коллективтер, өг-бүлелер, ансамбльдер-даа бар. Оларның чоруткан видео-ажылдарын республиканың улусчу чогаадылга болгаш дыштанылга төвүнүң интернетте “ВКонтакте” социал четкиде арынынга салырга, өске социал четкилерже дамчып турган. Чүгле “ВКонтакте” социал четкиниң онлайн-көрүкчүлериниң саны безин 33 муң кижи четкен. Чаңгыс постунуң көрүлдези 9 муң чедип турган.
“Бот-хоргадал-даа үези болза, “Тиилелгениң салюду” чаа хевирге, дыка солун эртти. Республиканың улусчу чогаадылга болгаш дыштанылга төвүнүң эки ажылы деп үнелээр-дир мен. Ол дээрге, бодунуң сагыш-сеткилин, талантызын чонга бараалгадыксап чоруур чогаадыкчы кижилерге улуг деткимче-дир. Дайын темазы эң-не харыысалгалыг. Киржикчилер дайынчыларның маадырлыг чоруун мөңгежидип турары өөрүнчүг-дүр. Ылаңгыя Сүт-Хөл кожууннуң Бора-Тайга сумузундан кырган-авай бодунуң уйнуктарынга Тываның дайын чылдарында амыдыралының дугайында төөгүп турары демдеглексенчиг-дир. Чамдык кожууннар мөөрейниң негелдезин сагывайн барганындан үнелел бербейн бардывыс. Онлайн-мөөрейни демдеглеп, үнелеп көөрү арай нарын, берге-даа болза, шупту – киржикчилер-даа, жюри-даа кызыттывыс. Фестиваль болуп эрткен!” – деп, жюри кежигүнү, Россияның алдарлыг артизи, Тываның улустуң артизи Надежда Наксыл бодунуң бодалдары-биле үлешти.
Неделя дургузунда үргүлчүлээн онлайн-мөөрейниң түңнелинде, жюри Дээди шаңналды тывыспас деп шиитпир үндүрген. Бирги черге Сүт-Хөл кожуун төлептиг болган! Ийигизин Чөөн-Хемчик биле Кызыл кожуунга тывыскан. Үшкү черге чаа-хөлчүлер тергиидээн.
“Тиилелгениң салюду” – улусчу чогаадылганың Бүгү-российжи фестивалы. Ол 1995 чылдан тура 5 чыл болгаш-ла эрттип турар. Алды дугаар фестиваль шак-ла мындыг бир онзагай байдалга эрткени бо.
СМИ о нас. Агентство "Тывамедиагрупп": "СҮТ-ХӨЛЧҮЛЕР ТЕРГИИДЭЭН"
26 Май.
