Куда - эң-не ыдыктыг болгаш ханы утка сиңген, ынакшааннарның чаңгыс өг-бүле болуп, кады чурттаарын алгап-йөрээген онзагай байырлал.
Аныяк оол-кыска күрүнениң таваа болур өг-бүлени тургузары, чаш салгалды чаяап-бодарадыры база кадык-шыырак кылдыр төлептиг өстүрери, ийи аңгы аймак чонну төрелдештиргени, ажыл-ишти, өөредилгени чедиишкинниг уламчылаары, келир үеде оран-чурттун сайзырадыр улуг үүлени чогудары база бо-ла бүгүнүң мурнунда шыңгыы харыысалганы онааттынганы бо куда хүнүнден эгелээр. Ынчангаш ук байырлалды эрттирерде араганы шуут шегледири чугула. Кудада аалчыларның чүрээнден үнген йөрээлдери, алгыштары, макталдары база өргүп сунган белектери элээр угаандан, арыг сеткилден болур ужурлуг.
Куданы ажыдарда бир дугаар йөрээл дашказын арага-биле эвес, а сүт-биле өргүүр болза, өгленишкен оол-кыстың амыдырал-чуртталгазы аяс хүн дег аас-кежиктиг болуру чигзиниг чок. Чүге дээрге, элээр аалчылар өөрүшкүнү көвүдедир: элээр тургаш оюн-мөөрейге киржири чүден артык солун, элээр ырлаар-самнаарга эң-не чараш, элээр кудалаарга ол байырлал кажан-даа уттундурбас база элээр аалчылар куда соонда амыр-менди чана бээр.
Арагада кедилиг чүүл черле чок, арагадан эки медээ үнмес, арага эки эвес уржуктарны оштаар, арага анчыг сөстерниң, эпчок ужуралдарның, хоозуралдың база ядыы-түремик байдалдың чылдагааны.
Араганы амзаптарга, кижиниң медерели туманналыр. Бир дугаар кижиниң арнының өңү өскерли бээр, ооң бажында чиге, чарт, шын бодалдар бот- шынарын чидирер, дылы сула салдынып, чугаалаар сөзү бодап турарындан сыр өске апаар... Бодалдар, чугаа-домак, базымнар, шимчээшкиннер кижиниң элээр турганындан шуут өскерлир.
Хүндүлүг эш-өөр!
Мурнувуста магалыг чай келген. Чайын кудаларның болгаш өг-бүле байырлалдарының хөй кезии болур дээрзин билир бис. Өг-бүлеңерниң чараш байырлалы чүгле аас-кежикти, өөрүшкүнү эккелзин деп бодаар болзуңарза, “Араганың кырынга чам үнер” дээн үлегер домакты сактып чоруулуңар! Элээр чорукту деткип, арага делгевейн, араганы чок болдурар дээн изиг үзел-сорукту чөптүгзүнүп, эки эгелээшкинге каттыжып, эзиртир суксун чокка кудаларны болгаш бүгү өг-бүле байырлалдарын эрттирерин кыйгырдывыс.
Чуруктарны интернет четкизинден алган.
КУДАЛАРНЫ ЭЗИРТИР СУКСУН ЧОККА ЭРТТИРЭЭЛИ!
12 Май.
