Тыва чоннуң үнелиг эртинези болган төрээн тыва дылды сайзырадыр, байлакшыдар, камгалап-кадагалаар, деткиир болгаш чугаа культуразын бедидер сорулга-биле ноябрь 1-де Тыва дыл хүнүн тургузар дугайында эгелекчи саналды Улустуң чогаалчызы, хүндүлүг шүлүкчү Александр Александрович Даржай киирген. 2016 чылдан тура ук байырлалды чылдың-на эрттирип турар бис.Чонувуска тыва дыл хүнү таварыштыр төрээн дылывыстың мөңге артары дээш, чонувус чоргаар чорзун дээш дараазында профессор Шулуу Чыргал-оолович Саттың бижээни йөрээлди сөңнедивис.
“ТЫВА ДЫЛЫМГА ЙӨРЭЭЛ”
Улуг-Хемниң агымы дег күштүг, ак-көк Тывавыстың дээри дег арыг, бора хектиң эдери дег өткүт, алдын-сарыг сыгырганың эдери дег элдептиг төрээн дылывыс! Сенде хову-шөлдерниң делгемнери, тайга-таңдыларның бедиктери, кылаң хөлдерниң оожум-топтуу, оран-делегейниң оът-сигениниң айдызы, аң-меңиниң алгы-кышкызы сиңген.
Чырык өртемчейге карак чивеш аразында чуртталгамда тыва дылдыг төрээн чонум аразында чор мен. Өргүн-көвей улустарның дылдарының аялгаларының аразынга мөңге шагда хомустуң үнү бооп чаңгыланып чор, өлчей кежиктиг хайыралыг төрээн дылым!
Хүндүлүг тыва чонувус!!! Тыва дылывысты үнелеп, камнап, камгалап чоруулуңар.Тыва дыл барда, тыва нация бар. Тыва дылывыс хүнү-биле!
Тыва дыл хүнү-биле! С Днем тувинского языка!
01 Ноя.
