Делегей чергелиг гениалдыг ховар чурукчу, Надежда Николаевна Рушева чораан болза, бо чылдың январь 31-де 70 харлаар турган. Культура одаглары 100 ажыш темалыг хемчеглерни эртиргеннер.
Авазы, Наталья Дойдаловна Ажыкмаа-Рушева бистиң чаңгыс чер-чуртуувус боорда, баштайгы тыва балерина болуп, төөгүде артканы чоргааранчыг. Ачазы, Николай Рушев салым-чаяанныг чурукчу болбушаан, бичии Надя 5 хар четпээнде-ле, уруунуң чурулгага сундулуун ажыткаш, ооң хензиг када-ла чырыш кынган чуртталгазынга октаргай сылдыстарының өшпес чырыы ышкаш, балаттынмас истерни артырарынга чугула рольду ойнаан. 17 харлыынга чедир санап четпес хөй чуруктарын чурттуң улуг музейлеринче киир делгеп болур кылдыр артырганы кайгамчыктыг ховар, солун төөгү болуп арткан. Делегейниң ёзулуг-ла дириг эртинези болуп, амдыгаа чедир бүдүн бөмбүрзектиң чоннарының бедик үнелелин чаалап артпышаан салымныг киживистиң назыны дыка кыска болганы харааданчыг. Ынчалзажок кижи бүрүзүнүң чүрээнге кезээ мөңгеде аныяк чалыы, ховар уран-талантылыг кызывыс болуп арткан – Надя Рушеваның чырык адынга тураскааткан хемчеглерни эртирип, утпайн мөңгежидип чоруурувус өөрүнчүг. Ниитизи-биле Тываның культура бажыңнары болгаш төптери 60 информастыг шактарны, 37 чурук делгелгелерин, 31 өөредиглиг кичээлдерни болгаш ажык чугааларны, 7 кино болгаш театржыткан көргүзүглерни, 4 ужуражылгаларны, 34 мөөрейлерни, 5 викторинаны, 7 видеокөргүзүглерни база 1 акцияны эртиргеннер.
НАДЯ РУШЕВАНЫҢ 70 ХАРЛААН ОЮНГА ТУРАСКААТКАН 186 КУЛЬТУРА-МАССАЛЫГ ХЕМЧЕГЛЕР ЭРТКЕН
09 Фев.
