Марттың 15тен 16че хондур таалыңнар болгаш тыва чем сугар хаптарны даараарынга хоорайдан болгаш кожуун бүрүзүнден хоочуннар улуг үлүг-хуузун киириштирип дузалашканнар. Олар чүгле аңаа кызыгаарлаттынмайн, төрээн черивис оолдарынга чылыг уктарны аргып, чем болгаш чугула херек чүүлдерни садып эккеп, материалдыг дузаны база чедирип турарлар.
Шаанда 1940 чылдың дайынында бистиң ада-иелеривис дузаны чедирип чорааннар болгай. Бо хүн бистиң дуза чедирер уевис келгени бо. Украинада дайында киржип турар тыва оолдарывыстың хей-ады бедик болзун дээш, тыва чон кады бис деп деткип, сеткил чүрээ-биле дузазын чедирип турары өөрүнчүг-дүр. Бис биче буурай чон бис. Бот боттарывыска дузалажып деткижери чугула. Ол дайында киржип турар оолдар бистиң, тыва херээжен чоннуң оолдары- дыр. Ие кижиге төлү дээнде хаяа даш-даа, далай суг-даа моондак болуп шыдавас-ла болгай - деп, улусчу чогаадылга төвүнүң специализи, Тыва республиканың культуразының алдарлыг ажылдакчызы, культураның тергиини база хоочуну Зоя Доржуевна Монгуш чугаалап тур.
Ынчангаш, улуг биче тыва чонувусту бо демниг акцияга киржиирин кыйгырдылар!
Тываның культура болгаш уран чүүлдүң хоочуннар соведи "ТЫВАДАН ООЛДАРГА ДУЗА" - деп акцияга киришкеннер.
17 Мар.
