Чылдың дөрт эргилдезинде чонну уран чүүлге хаара тудуп, оларның хостуг үезин чөптүг ажыглаар байдалды тургузары-биле культура ажылдакчылары улуг күштү үндүрүп, янзы-бүрү хемчеглерни эртирип турар. Темалыг ужуражылгалар, мөөрейлер, уругларга оюн-тоглаалыг дыштанылга, дузалал ажылы дээш хемчеглер эртттирип, дыштаныр хүн чок республиканың культура бажыңнары ажылдап турар.
Чижээ, Улуг-Хем кожууннуң Торгалыг суурнуң культура бажынының коллективи тус черниң малчыны Ооржактың өг-бүлезиниң малын кыргыжып, дузалал ажылын чоргускан. Таңды кожууннуң культура ажылдакчылары Уурглайлыг аржаанының девискээрин боктан аштаарынга киришкен.
Чайгы үеде культура ажылдакчылары хемчеглерден аңгыда септелге ажылын база кылырлар. Тес-Хем кожууннуң Самагалдай суурнуң К.Баазан-оол аттыг культура одааның болгаш Амбын-ноян аттыг шөлдүң косметиктиг септелгезин бо хүннерде культура ажылдакчылары чоруткан.
Чаа-Хөл суур бо чылын тургустунганындан бээр 135 чыл болуп турар. Ук байырлалга тураскааткан шыдыраа турнирин кожууннуң культура одаа чурттакчы чон хараа тудуп, эрттирген.
Эрзин кожууннуң Бай-Даг суурнун-ң культура одаанга до хуннерде солун ужуражылга болган. Тываның күрүне университединиң тыва дыл салбырының сургуулдары суурнуң улуг назылыг кижилери-биле ужуражып, шинчилел ажылын кылып келгеннер. Суурнуң хоочуннары аалчыларга тус черниң ыдыктыг черлериниң төөгүзүн, билдингир чурттакчыларының допчу-намдары-биле таныштырып, тыва дылга хамаарышкан чидиг айтырыгларны сургуулдар-биле чугаалашканнар.
Тываның культура одагларындан медээлер
28 Июн.
